Isaiah 43

UMsindisi Yedwa Ka-Israyeli

1Kodwa khathesi, nanku akutshoyo uThixo uthi,
yena owakudalayo, wena Jakhobe,
yena owakubumbayo, wena Israyeli:
“Ungesabi, ngoba ngikuhlengile;
ngikubize ngebizo lakho; ungowami.
2Lapho udabula phakathi kwamanzi
ngizakuba lawe;
lalapho udabula emifuleni,
kayiyikukukhukhula.
Lapho uhamba phakathi komlilo, kawuyikutsha;
amalangabi kawayikukubhebhisa.
3Ngoba mina nginguThixo uNkulunkulu wakho,
oNgcwele ka-Israyeli, uMsindisi wakho.
Ngizanikela iGibhithe njengenhlawulo yakho,
iKhushi leSebha ime esikhundleni sakho.
4Njengoba wena uligugu njalo udumile ebusweni bami,
futhi ngenxa yokuthi ngiyakuthanda,
ngizanikela abantu esikhundleni sakho,
labantu esikhundleni sempilo yakho.
5Ungesabi, ngoba ngilawe;
ngizakulethela inzalo yakho ivela empumalanga
ngikubuthe kusukela entshonalanga.
6Ngizakutsho kuyo inyakatho ngithi, ‘Bakhulule!’
Ngitsho kuyo iningizimu ngithi, ‘Ungabagodli.’
Buyisani amadodana ami
akude lamadodakazi ami asemikhawulweni yomhlaba,
7wonke umuntu obizwa ngebizo lami,
engamdalela udumo lwami,
engambumbayo, ngamenza.”

8Phumani lalabo abayiziphofu amehlo belawo,
abayizacuthe indlebe belazo.
9Izizwe zonke kaziqoqane ndawonye
labantu babuthane.
Nguphi wabo owaphrofitha lokhu
wamemezela kithi ngezinto zendulo?
Kabalethe ofakazi babo babonakalise ukuthi baqinisile,
ukuze abanye bezwe, batsho bathi, “Kuqotho.”
10 UThixo uthi, “Lina lingofakazi bami,
lenceku zami engizikhethileyo,
ukuze lazi, likholwe kimi,
njalo lizwisise ukuthi mina nginguye.
Ngaphambi kwami kakho unkulunkulu owake wabakhona,
njalo kakho ozakuba khona emva kwami.
11Mina, mina uqobo, nginguThixo,
ngaphandle kwami kakho omunye umsindisi.
12Ngivezile ngasindisa, ngamemezela, mina ngokwami,
hatshi unkulunkulu wezizweni ophakathi kwenu.
Lingofakazi bami, ngokuthi mina yimi uNkulunkulu”
kutsho uThixo.
13“Ye, kusukela ensukwini zasendulo nginguye.
Kakho ongakhulula esandleni sami.
Lapho ngisenza, ngubani ongakuguqula na?”

Umusa KaNkulunkulu Lokungathembeki Kuka-Israyeli

14Lokhu yikho okutshiwo nguThixo,
uMhlengi wenu, oNgcwele ka-Israyeli, uthi,
“Ngenxa yenu ngizathumela impi eBhabhiloni
ilethe bonke abaseBhabhiloni,
njengeziphepheli ngemikhumbi ababezigqaja ngayo.
15Mina nginguThixo, oNgcwele wenu,
uMdali ka-Israyeli, iNkosi yenu.”

16Nanku akutshoyo uThixo,
yena owenza indlela olwandle
lomkhondo emanzini alamandla,
17yena owakhupha izinqola zempi lamabhiza,
ibutho, lamanye awokuliqinisa endawonye;
njalo lalala lapho, kalaze lavuka futhi;
licitshe, liqunywe njengentambo yesibane:
18“Khohlwani izinto zamandulo,
linganakani ngosekwedlulayo.
19Khangelani, ngenza okutsha!
Khathesi kuyavela ngokuphangisa; kalikuboni na?
Ngenza indlela enkangala
lezifula ogwaduleni.
20Izinyamazana zeganga ziyangidumisa;
amakhanka lezikhova,
ngoba ngenza kube lamanzi enkangala
lezifula ogwaduleni
ukuze nginathise abantu abakhethiweyo,
21abantu engazenzela bona
ukuba bangidumise.

22Kodwa kawukhalazanga kimi wena Jakhobe,
kodwa ukhathele ngami wena Israyeli.
23Kawungilethelanga izimvu zomnikelo wokutshiswa,
kumbe wangidumisa ngemihlatshelo yakho.
Angikuhluphanga ngeminikelo yamabele
kumbe ngakudinisa ngokufuna impepha.
24Kawungithengelanga amakha ekhane anuka mnandi,
kumbe wangisuthisa ngamahwahwa emihlatshelo yakho.
Kodwa ungikhathazile ngezono zakho
njalo wangidinisa ngezinengiso zakho.

25Mina, mina uqobo, nginguye owesula
iziphambeko zakho ngenxa yami,
ngingabe ngisazikhumbula futhi izono zakho.
26Ngikhumbuza ngesikhathi esedlulayo,
sibonisane ngaleyondaba
ulandise ngoba msulwa kwakho.
27Ukhokho wakho wokuqala wona;
labakhulumeli bakho bangihlamukela.
28Ngakho izikhulu zethempelini lakho ngizaziyangisa;
nginikele uJakhobe ekubhujisweni
lo-Israyeli ekweyisweni.”